Nakulam yata ako. Laging sumasakit ang likod ko, hindi matanggal-tanggal. Nakailang bisita na ako sa medico, pinag-therapy pa ako. Umiinom din ako ng gamot na reseta ng medico. Pero wala pa rin, masakit talaga. Wala namang makitang masama sa mga x-ray ko. Ahhh... kulam na nga siguro ito.
*********
Nung tumawag ako sa Pilipinas noong nakaraang linggo, nasabi ko sa nanay ko ang problema ko. Sakto namang nandoon sa bahay namin yung kapitbahay naming si Tandang Lucio, isang albularyo. Nung marinig nya ang sakit ko, tinanong niya kung hinawakan daw ako ni Aling Sela, yung kapitbahay din namin sa Pilipinas na nandito din sa España, at hinihinalang isang mangkukulam. Huwag daw akong magpapahawak sa kanya, malakas daw ang kulam niya. Too late the hero, Tandang Lucio. Nagkita kami sa isang birthday celebration ni Aling Sela noong Mayo. Hindi lang kami nagbeso-beso. Sumayaw pa kami sa ballroom pagkatapos ng party. At siyempre, hindi lang niya ako hinawakan, kinapitan niya ako!
*********
Oo nga ano. Parang pagkatapos ng birthday party at ballroom nagsimulang sumakit ang likod ko! Mukhang kinulam nga ako ni Aling Sela. Balita na kasi sa barangay namin na mangkukulam siya kahit noong bata pa ako. Marami daw siyang kinulam, meron pang namatay. Kung ano anong sakit ang dumadapo sa mga kinukulam nya: lagnat, nagsusuka (kung napakain ng may kulam), nawawala sa tamang pag-iisip. Makapangyahihan si Aling Sela. Malakas ang kulam niya.
*********
Ayon sa mga kwento ng mga matatanda, ang kulam ay isang uri ng itim na magic na kumokontrol, nakakasakit at nagbibigay ng malas sa ibang tao. Meron din daw magandang kulam na kabaliktad naman ang epekto, subalit mas laganap ang itim o masamang kulam. Ang kapangyarihan daw para mangkulam ay naipapasa sa ibang taong gusto paglipatan ng mangkukulam kapag siya ay malapit ng mamatay. At ang balita, namana daw ni Aling Sela ang kanyang kapangyarihan mula sa kanyang ina na isa ring mangkukulam.
*********
Madalas daw gamitin sa pangkukulam ang isang itim na manika, parang voodoo doll. Nilalagyan ito ng buhok o piraso ng damit ng biktima. Ginagawa ang ritwal. Saka tutusukin ng karayom ang itim na manika. At sa eksaktong bahagi ding iyon ng katawan ng biktima ang sasakit. Iniisip ko kung paano ako nakuhanan ng buhok ni Aling Sela. Baka noong sumasayaw kami ng cha-cha.
**********
Akala ko naman kasi ay nawala na ang kulam ni Aling Sela noong pumunta siya dito sa España. Siguro ay nadala niya ang itim niyang manika. Hindi naman kasi alam dito sa España na gamit sa pangkukulam iyon. Sayang, kung nalaman ko lang sana na may kapangyarihan pa rin siya, nasuot ko sana yung kaisa-isa kong singsing na may maliit na brilyante. Takot daw kasi ang mga mangkukulam sa brilyante. May nagsasabi rin na takot sila sa pulang posporo at sa bala ng baril. Pati rin daw sa cactus.
**********
Meron pa naman daw gamot sa kulam sa akin ni Aling Sela. Magpakulo daw ako ng 7 uri ng dahon, uminom ng isang baso ng pinagpakuluan sa loob ng 7 araw. At gamitin ko ring panligo ang tubig na pinagpakuluan sa 7 dahon sa loob ng 7 araw. Mawawala na raw ang kulam, sabi ni Tandang Lucio, ang magaling na albularyo. Ang problema ko lang, saan ko kukunin ang 7 dahon dito sa España eh sa Pilipinas lang yata tumutubo ang mga tanim na ito?! Magpapadala daw ang nanay ko kapag may umuwing galing España sa barangay namin. O di kaya ay i-DHL daw niya ang mga dahon. Sus, pwede kaya yun??!
**********
Habang hindi pa dumarating ang 7 dahon na gagamot sa kulam sa akin, magtitiis muna ako sa mga inireseta ng medico. Eh kung kausapin ko kaya si Aling Sela na alisin na niya ang kulam na ginawa sa akin? Kaya lang baka magalit siya. Baka naman kasi hindi totoong mangkukulam pa siya. O di naman kaya ay mas lalo pa niyang bigatan ang kulam sa akin kasi alam ko ng mangkukulam siya.
**********
Kayo, naniniwala ba sa kulam? Meron pa kayang kulam dito sa España? Gusto niyo bang matutong mangkulam o di kaya ay matuto kung paano ito kontrahin? Heto, meron akong nahanap na blog tungkol sa kulam at iba pang kapangyarihang Filipino. Basahin din ninyo. Kayo rin, baka kayo ang sumunod na makulam at sumakit din ang likod ninyo.
